ଟ୍ରମ୍ପଙ୍କ ଘୋଷଣା ପରେ ହଠାତ୍ ୧୪୦୦ ଟଙ୍କା ଶସ୍ତା ହେଲା ସୁନା

ସୁନା ଦରରେ ଲାଗି ରହିଥିବା ଦ୍ରୁତ ବୃଦ୍ଧି ଉପରେ ବ୍ରେକ୍ ଲାଗିଛି । ଗୋଟିଏ ପଟେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୁନାକୁ ଟାରିଫରୁ ଦୂରରେ ରଖିବାକୁ ଘୋଷଣା କରିବା ପରେ, ମଲ୍ଟି କମୋଡିଟି ଏକ୍ସଚେଞ୍ଜରେ ସୁନାର ମୂଲ୍ୟ ହଠାତ୍ ୧୪୦୦ ଟଙ୍କାରୁ ଅଧିକ ହ୍ରାସ ପାଇଛି । ତେବେ, ସୁନା ଏବେବି ୧ ଲକ୍ଷ ଟଙ୍କା ପାର୍ କରିଛି, କିନ୍ତୁ ଏହା ନିଜର ସର୍ବକାଳୀନ ଉଚ୍ଚ ସ୍ତରରୁ ଯଥେଷ୍ଟ ହ୍ରାସ ପାଇ କାରବାର କରୁଛି ।

ସୁନାକୁ ନେଇ ଟ୍ରମ୍ପ କ’ଣ କହିଲେ?

ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସୋସିଆଲ ମିଡିଆ ପ୍ଲାଟଫର୍ମ ‘ଟ୍ରୁଥ୍ ସୋସିଆଲ’ରେ ନିଜର ଏକ ପୋଷ୍ଟରେ ସିଧାସଳଖ ଲେଖିଛନ୍ତି ଯେ ସୁନା ଉପରେ ଟାରିଫ୍ ଲଗାଯିବ ନାହିଁ । ତାଙ୍କର ଏହି ଘୋଷଣା ପରେ ଆନ୍ତର୍ଜାତୀୟ ବଜାରରେ ଗୋଲ୍ଡ ଫ୍ୟୁଚର୍ସର ମୂଲ୍ୟରେ ହଠାତ୍ ଦ୍ରୁତ ହ୍ରାସ ଘଟିଥିଲା ଏବଂ ଏହା ୨.୪୮% ହ୍ରାସ ପାଇ ୩,୪୦୪.୭୦ ଡଲାର ପ୍ରତି ଆଉନ୍ସରେ ବନ୍ଦ ହୋଇଥିଲା ।

ଘରୋଇ ବଜାରରେ ଏହି ପରିବର୍ତ୍ତନ

ଘରୋଇ ବଜାରରେ ସୁନା ଦରରେ ହୋଇଥିବା ପରିବର୍ତ୍ତନ ଉପରେ ନଜର ପକାଇଲେ, ଇଣ୍ଡିଆନ୍ ବୁଲିୟନ୍ ଜ୍ୱେଲର୍ସ ଆସୋସିଏସନର ୱେବସାଇଟ୍ IBJA.Com ଅନୁଯାୟୀ, ସୋମବାର ୨୪ କ୍ୟାରେଟ୍ ସୁନାର ମୂଲ୍ୟ ୧,୦୦,୨୦୧ ଟଙ୍କା ପ୍ରତି ୧୦ ଗ୍ରାମ ଥିଲା, କିନ୍ତୁ ବଜାରରେ କାରବାର ବନ୍ଦ ହେବା ବେଳକୁ ଏହା ୧ ଲକ୍ଷ ଟଙ୍କାରୁ ତଳକୁ ଖସି ୯୯,୯୫୭ ଟଙ୍କାରେ ବନ୍ଦ ହୋଇଥିଲା । ଅର୍ଥାତ୍ ସୁନା ଦରରେ ୨୪୪ ଟଙ୍କାର ହ୍ରାସ ଘଟିଛି । ଅନ୍ୟ ଗୁଣବତ୍ତାର ସୁନା ମୂଲ୍ୟ ଉପରେ ନଜର ପକାଇଲେ, ୨୨ କ୍ୟାରେଟ୍ ସୁନାର ମୂଲ୍ୟ ୯୭,୫୬୦ ଟଙ୍କା ପ୍ରତି ୧୦ ଗ୍ରାମକୁ ହ୍ରାସ ପାଇଛି । ସେହିପରି ୨୦ କ୍ୟାରେଟ୍ ସୁନାର ମୂଲ୍ୟ ୮୮,୯୬୦ ଟଙ୍କା ପ୍ରତି ୧୦ ଗ୍ରାମ ରହିଛି ।

ଇଣ୍ଡିଆନ୍ ବୁଲିୟନ୍ ଜ୍ୱେଲର୍ସ ଆସୋସିଏସନର ୱେବସାଇଟରେ ପ୍ରତିଦିନ  ସକାଳ ଓ  ସନ୍ଧ୍ୟାରେ ସୁନା-ରୂପା ଦର ଅପଡେଟ୍ ହୋଇଥାଏ ଏବଂ ଏହା ସାରା ଦେଶରେ ସମାନ ରହିଥାଏ । ତେବେ ଯେତେବେଳେ ଆପଣ ଅଳଙ୍କାର କିଣିବାକୁ ଯାଆନ୍ତି,  ସେତେବେଳେ ଆପଣଙ୍କୁ ସୁନା ପାଇଁ ନିର୍ଦ୍ଧାରିତ ୩ ପ୍ରତିଶତ ଜିଏସଟି  (Gold GST) ଏବଂ ମେକିଂ ଚାର୍ଜ ମଧ୍ୟ ଦେବାକୁ ପଡିଥାଏ । ଯାହାଦ୍ୱାରା ଏହାର ମୂଲ୍ୟରେ ବୃଦ୍ଧି ଦେଖାଯାଏ ।  ଏହି ମେକିଂ ଚାର୍ଜ ରାଜ୍ୟ ଓ ସହର ଅନୁସାରେ ଭିନ୍ନ ଭିନ୍ନ ହୋଇପାରେ  ।  MCX ରେ ସୁନାର ସର୍ବକାଳୀନ ଉଚ୍ଚ ସ୍ତର ୧,୦୨,୨୫୦ ଟଙ୍କା ପ୍ରତି ୧୦ ଗ୍ରାମ ରହିଛି ଏବଂ ଏହା ତୁଳନାରେ ସୁନା ଦର ୧୮୬୧ ଟଙ୍କା ଶସ୍ତା ଅଟେ । ମଙ୍ଗଳବାର ଦିନ ମଧ୍ୟ ଯେତେବେଳେ ବାୟଦା କାରବାର ଆରମ୍ଭ ହେଲା, ସୁନା ଦର ହ୍ରାସ ସହିତ ଖୋଲିଥିଲା  ।