ଇଡି ଅଫିସ୍‌ରେ ଅନିଲ ଅମ୍ବାନୀ: ୧୭୦୦୦ କୋଟି ଟଙ୍କାର ଋଣ ଠକେଇର ଦେବେ ଜବାବ

ନୂଆଦିଲ୍ଲୀ,୫।୭: ରିଲାଏନ୍ସ ଗ୍ରୁପ ଅଧ୍ୟକ୍ଷ ଅନିଲ ଅମ୍ବାନୀ ଦିଲ୍ଲୀସ୍ଥିତ ଇଡି କାର୍ଯ୍ୟାଳୟରେ ପହଞ୍ଚିଛନ୍ତି। ଏଠାରେ ତାଙ୍କୁ ୧୭୦୦୦ କୋଟି ଟଙ୍କାର ଋଣ ଠକେଇ ମାମଲାର ତଦନ୍ତ ସମ୍ପର୍କରେ ପଚରାଉଚରା କରାଯିବ। ଇଡିର କଥିତ ମନି ଲଣ୍ଡରିଂ ତଦନ୍ତ ଅଧୀନରେ ଅନିଲଙ୍କୁ ଗତ ସପ୍ତାହରେ ସମନ କରାଯାଇଥିଲା। ପଚରାଉଚରା କରାଯାଇଥିବା କମ୍ପାନୀଗୁଡ଼ିକ ମଧ୍ୟରେ ରିଲାଏନ୍ସ ହୋମ ଫାଇନାନ୍ସ ଲିମିଟେଡ (RHFL), ରିଲାଏନ୍ସ କମର୍ସିଆଲ ଫାଇନାନ୍ସ ଲିମିଟେଡ (RCFL) ଏବଂ ରିଲାଏନ୍ସ କମ୍ୟୁନିକେସନ୍ସ (RCom) ଅନ୍ତର୍ଭୁକ୍ତ।

ଅଭିଯୋଗ ହେଉଛି, ଅନିଲଙ୍କ ରିଲାଏନ୍ସ ଗ୍ରୁପର ଏହି କମ୍ପାନୀଗୁଡ଼ିକ ବ୍ୟାଙ୍କଗୁଡ଼ିକରୁ ହଜାର ହଜାର କୋଟି ଟଙ୍କାର ଋଣ ନେଇଛନ୍ତି ଏବଂ ସେହି ଟଙ୍କାକୁ ସଠିକ ଭାବରେ ବ୍ୟବହାର କରିନାହାଁନ୍ତି। ଅର୍ଥାତ୍‌ ଯେଉଁ ଉଦ୍ଦେଶ୍ୟ ପାଇଁ ଋଣ ନିଆଯାଇଥିଲା ତାହା ପୂରଣ ହୋଇ ନ ଥିଲା, ବରଂ ସେହି ଟଙ୍କାକୁ ସେଲ କମ୍ପାନୀଗୁଡ଼ିକ ମାଧ୍ୟମରେ ବ୍ୟବହାର କରାଯାଇଥିଲା। ଏହା ବ୍ୟତୀତ, ଇଡି ତଦନ୍ତରେ ଅନେକ ନକଲି ଡକ୍ୟୁମେଣ୍ଟ ଏବଂ ବ୍ୟାଙ୍କ ଗ୍ୟାରେଣ୍ଟି ବ୍ୟବହାର ହୋଇଥିବା ମଧ୍ୟ ପ୍ରକାଶ ପାଇଛି।

ମନି ଲଣ୍ଡରିଂ ନିବାରଣ ଆଇନ (PMLA) ଅଧୀନରେ ଆରମ୍ଭ ହୋଇଥିବା ଏହି ଇଡି ତଦନ୍ତ ପ୍ରାୟ ୨୦ଟି ଘରୋଇ ଏବଂ ସରକାରୀ ବ୍ୟାଙ୍କରୁ ନିଆଯାଇଥିବା ଋଣ ସହିତ ଜଡିତ, ଯାହା ବର୍ତ୍ତମାନ ନନ-ପର୍ଫର୍ମିଂ ଆସେଟ (NPA)ରେ ପରିଣତ ହୋଇଛି। ଇଡି ତଦନ୍ତ ଅନୁଯାୟୀ, RHFLର ୫,୯୦୧ କୋଟି ଟଙ୍କା, RCFL ର ୮,୨୨୬ କୋଟି ଟଙ୍କାରୁ ଅଧିକ ଏବଂ RCom ର ପ୍ରାୟ ୪,୧୦୫ କୋଟି ଟଙ୍କା ବକେୟା ଅଛି।

ଇଡି ବ୍ୟାଙ୍କଗୁଡ଼ିକର ବରିଷ୍ଠ ଅଧିକାରୀମାନଙ୍କୁ ଡକାଇ ଋଣ ପ୍ରଦାନର ସମ୍ପୂର୍ଣ୍ଣ ପ୍ରକ୍ରିୟା, ଋଣ ଖିଲାପର ସମୟସୀମା ଏବଂ ତା’ପରେ ନିଆଯାଇଥିବା କାର୍ଯ୍ୟାନୁଷ୍ଠାନ ବିଷୟରେ ପଚରାଉଚରା କରିପାରେ। ରିଲାଏନ୍ସ ଗ୍ରୁପ କମ୍ପାନୀଗୁଡ଼ିକୁ ଋଣ ଦେଇଥିବା ବ୍ୟାଙ୍କଗୁଡ଼ିକ ମଧ୍ୟରେ ୟେସ ବ୍ୟାଙ୍କ, ଷ୍ଟେଟ ବ୍ୟାଙ୍କ ଅଫ ଇଣ୍ଡିଆ, ଆକ୍ସିସ ବ୍ୟାଙ୍କ, ICICI ବ୍ୟାଙ୍କ, HDFC ବ୍ୟାଙ୍କ, ବ୍ୟାଙ୍କ ଅଫ ଇଣ୍ଡିଆ, UCO ବ୍ୟାଙ୍କ ଏବଂ ପଞ୍ଜାବ ଆଣ୍ଡ ସିନ୍ଧ ବ୍ୟାଙ୍କ ଅନ୍ତର୍ଭୁକ୍ତ।