ପାକ୍‌କୁ ମୋଦୀଙ୍କ ବ୍ରହ୍ମୋସ୍ ଚେତାବନୀ: ‘ୟୁପିରେ ନିର୍ମାଣ ହେଉଛି କ୍ଷେପଣାସ୍ତ୍ର’ ‘ସ୍ବଦେଶୀ’ ଆପଣାଇବାକୁ ଆହ୍ବାନ

ବାରାଣସୀ: ଭାରତର ସ୍ୱଦେଶୀ ଅସ୍ତ୍ରଶସ୍ତ୍ର  ବ୍ୟବହାର କରି ଭବିଷ୍ୟତରେ ଯେକୌଣସି ଆତଙ୍କୀ କାର୍ଯ୍ୟର ନିର୍ଣ୍ଣାୟକ ଜବାବ ଦିଆଯିବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ପାକିସ୍ତାନକୁ କଡ଼ା ଚେତାବନୀ ଦେଇଛନ୍ତି। ଉତ୍ତରପ୍ରଦେଶର ବାରାଣସୀରେ ଉଦ୍‌ବୋଧନ ଦେଇ ମୋଦୀ ଘୋଷଣା କରିଛନ୍ତି, ବ୍ରହ୍ମୋସ୍ କ୍ଷେପଣାସ୍ତ୍ର ଏବେ ଲକ୍ଷ୍ନୌରେ ନିର୍ମିତ ହେବ। ଯଦି ପାକିସ୍ତାନ ପୁଣି ଥରେ କୌଣସି ପାପ କରେ, ତେବେ ୟୁପିରେ ନିର୍ମିତ କ୍ଷେପଣାସ୍ତ୍ର ଆତଙ୍କବାଦୀମାନଙ୍କୁ ଧ୍ୱଂସ କରିଦେବ।

ପ୍ରଧାନମନ୍ତ୍ରୀ ଭାରତର ପ୍ରତିରକ୍ଷା ସାମର୍ଥ୍ୟକୁ ପ୍ରଶଂସା କରି କହିଛନ୍ତି, ଅପରେସନ ସିନ୍ଦୂର ସମୟରେ ବିଶ୍ୱ ଆମର ସ୍ୱଦେଶୀ ଅସ୍ତ୍ରଶସ୍ତ୍ରର ସାମର୍ଥ୍ୟ ଦେଖିଥିଲା। ଆମର ଏୟାର୍ ଡିଫେନ୍ସ ସିଷ୍ଟମ୍, କ୍ଷେପଣାସ୍ତ୍ର ଓ ଡ୍ରୋନ୍ ‘ଆତ୍ମନିର୍ଭର ଭାରତ’, ବିଶେଷ କରି ବ୍ରହ୍ମୋସ୍ କ୍ଷେପଣାସ୍ତ୍ରର ଶକ୍ତି ପ୍ରମାଣିତ କରିଛି। ମୋଦୀ କହିଛନ୍ତି, ପାକିସ୍ତାନରେ ବ୍ରହ୍ମୋସ ନାମ ଶୁଣିବା ମଧ୍ୟ ସେମାନଙ୍କୁ ରାତିରେ ଜାଗ୍ରତ ରଖିବା ପାଇଁ ଯଥେଷ୍ଟ। ୟୁପି ଡିଫେନ୍ସ କରିଡରରେ ଅନେକ ପ୍ରମୁଖ ପ୍ରତିରକ୍ଷା କମ୍ପାନି ନିଜର ଉତ୍ପାଦନ କାରଖାନା ସ୍ଥାପନ କରୁଛନ୍ତି। ଭାରତରେ ନିର୍ମିତ ଅସ୍ତ୍ରଶସ୍ତ୍ର ଖୁବ୍ ଶୀଘ୍ର ଆମ ସେନାର ଶକ୍ତିରେ ପରିଣତ ହେବ। ପ୍ରଧାନମନ୍ତ୍ରୀ ମୋଦୀ ଜାତୀୟ ଏକତା ଓ ଅର୍ଥନୈତିକ ଆତ୍ମନିର୍ଭରଶୀଳତା ଉପରେ ଗୁରୁତ୍ୱାରୋପ କରିଥିଲେ। ସେ କହିଛନ୍ତି, ଭାରତ ବିଶ୍ୱର ତୃତୀୟ ବୃହତ୍ତମ ଅର୍ଥନୀତି ହେବାକୁ ଯାଉଛି ଏବଂ ସେଥିପାଇଁ ଭାରତକୁ ନିଜର ଅର୍ଥନୈତିକ ସ୍ୱାର୍ଥକୁ ନେଇ ସତର୍କ ରହିବାକୁ ପଡିବ। ଦେଶର ଅର୍ଥନୈତିକ ଲକ୍ଷ୍ୟ ହାସଲ ପାଇଁ ରାଜନୈତିକ ଏକତା ଲାଗି ସେ ଆହ୍ୱାନ ଦେଇଥିଲେ। ଭାରତୀୟ ନିର୍ମିତ ସାମଗ୍ରୀକୁ ସମର୍ଥନ କରିବାକୁ ସେ ନାଗରିକମାନଙ୍କୁ ଆହ୍ୱାନ ଦେଇ କହିଛନ୍ତି, ଆମେ କେବଳ ସେହି ଜିନିଷ କିଣିବୁ ଯାହା ଭାରତୀୟଙ୍କ ଦ୍ୱାରା ନିର୍ମିତ। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ରୁଷ୍ ସହ ସମ୍ପର୍କକୁ ସମାଲୋଚନା କରିବା ସହ ୨୫ ପ୍ରତିଶତ ଶୁଳ୍କ ଲାଗୁ କରିବାର କିଛି ଦିନ ପରେ ପ୍ରଧାନମନ୍ତ୍ରୀ ମୋଦୀ ‘ସ୍ୱଦେଶୀ’କୁ ଆପଣେଇବାକୁ ଆହ୍ୱାନ ଦେଇଛନ୍ତି।