ଗ୍ୟାଙ୍ଗଷ୍ଟର ହାଇଦର୍ ଫେରାର୍ ଘଟଣା : ମଙ୍ଗଳବାଗ ଥାନାରେ ନିଲମ୍ବିତ କନଷ୍ଟେବଳଙ୍କ ଏତଲା

  • ପରିବାର ଲୋକେ ହାଇଦରକୁ ଫେରାର୍ କରାଇଥିବା ଅଭିଯୋଗ

କଟକ : ଏସସିବି ମେଡ଼ିକାଲରୁ ଗ୍ୟାଙ୍ଗଷ୍ଟର ହାଇଦର୍ ଫେରାର୍ ଘଟଣାରେ ଆଉ ଏକ ନୂଆ ତଥ୍ୟ ସାମ୍ନାକୁ ଆସିଛି । ପରିବାର ଲୋକେ ହିଁ ହାଇଦରକୁ ଫେରାର୍ କରାଇଥିବା ଅଭିଯୋଗ ହୋଇଛି । ମଙ୍ଗଳବାଗ ଥାନାରେ ଏନେଇ ହୋଇଥିବା ଏତଲାରୁ ଏହି ତଥ୍ୟ ସାମ୍ନାକୁ ଆସିଛି । ସେ ସମୟରେ ଡ୍ୟୁଟିରେ ଥିବା କନଷ୍ଟେବଳ ମହମ୍ମଦ ମୌସିମଙ୍କ ପକ୍ଷରୁ ଏ ସଂକ୍ରାନ୍ତରେ ଏତଲା ହୋଇଛି । ପରିବାର ଲୋକେ ହିଁ ହାଇଦରକୁ ଫେରାର୍ ହେବାରେ ସହାୟତା କରିଥିବା ସେ ଏତଲାରେ ଦର୍ଶାଇଛନ୍ତି । ସେ ଉଲ୍ଲେଖ କରିଛନ୍ତି ଯେ, ହାଇଦର ନିକଟକୁ ନିୟମିତ ଭାବେ ତାର ସମ୍ପର୍କୀୟ ମାନେ ଦେଖା କରିବାକୁ ଆସୁଥିଲେ । ତା ପାଖକୁ ତାର ପୁଅ, ଭାଇ କାଳିଆ ଏବଂ ପୁତୁରା କାଲା ନିୟମିତ ଆସୁଥିଲେ । ଏହା ବ୍ୟତୀତ ତା ଶଳା ଗୋରା ଓ ସାନ ଜ୍ୱାଇଁ ମଧ୍ୟ ନିୟମିତ କ୍ୟାବିନକୁ ଆସୁଥିଲେ । ଏବଂ ହାଇଦର୍ ସହିତ କଥା ହେଉଥିଲେ । ୧୦ ତାରିଖ ଅପରାହ୍ନ ସାଢ଼େ ୪ଟାରେ ସେ ଡ୍ୟୁଟିରେ ଥିଲେ ଏବଂ ତାକୁ ଜଗି ରହିଥିଲେ । ଏହି ସମୟରେ ସେମାନେ ଆସି ପ୍ରଥମେ ମୋ ଉପରକୁ କିଛି ବିଷାକ୍ତ ପଦାର୍ଥ ଫିଙ୍ଗିଥିଲେ । ଏହାର ପ୍ରଭାବରେ ମୁଁ ଅଚେତ୍ ହୋଇପଡିଥିବା ବେଳେ ହାଇଦର୍ ସେଠାରୁ ଫେରାର୍ ହୋଇଯାଇଥିଲା ବୋଲି ଏତଲାରେ ଦର୍ଶାଇଛନ୍ତି ନିଲମ୍ବିତ କନଷ୍ଟେବଳ ମହମ୍ମଦ ମୌସିମ ।

ପ୍ରକାଶ ଥାଉ କି, ଗ୍ୟାଙ୍ଗଷ୍ଟର ହାଇଦର ଫେରାର୍ ଘଟଣାରେ ବିଭାଗୀୟ କାର୍ଯ୍ୟାନୁଷ୍ଠାନ ସ୍ୱରୂପ ୬ ଜଣ ପୋଲିସ କର୍ମଚାରୀଙ୍କୁ ଗତକାଲି ନିଲମ୍ବନ କରାଯାଇଛି । ଏନେଇ ବିଭାଗୀୟ ତଦନ୍ତ ପରେ ଜଣେ ହାବିଲଦାର ଓ ୫ ଜଣ କନଷ୍ଟେବଳଙ୍କୁ ନିଲମ୍ବନ କରାଯାଇଛି । ସେମାନେ ହେଲେ ହାବିଲଦାର ରମେଶ ଚନ୍ଦ୍ର ଦେହୁରୀ, କନଷ୍ଟେବଳ ବୁଲବୁଲ୍ ସାହୁ, କନଷ୍ଟେବଳ ଦୀପକ ସାହୁ, କନଷ୍ଟେବଳ ମହମ୍ମଦ ମୌସିମ, କନଷ୍ଟେବଳ ଉମାକାନ୍ତ ବେହେରା ଓ କନଷ୍ଟେବଳ ସୁଧାଶୁଂ ମାଝି ।

Spread the love