ଦିଲ୍ଲୀରେ ପଙ୍ଗପାଳ; ମୁକାବିଲା ପାଇଁ ଜରୁରୀ ବୈଠକ

ନୂଆଦିଲ୍ଲୀ : ଦିଲ୍ଲୀରେ ପଙ୍ଗପାଳ ମାଡିଆସିଛନ୍ତି। ଏମାନେ ବିଭିନ୍ନ ଗଛର ଡାଳ ପତ୍ର ଖାଇ ଗଛ ସବୁକୁ ଲଣ୍ଡା କରି ପକାଉଛନ୍ତି। ତେବେ ଦିଲ୍ଲୀରେ କରୋନା ମହାମାରୀ ଆତଙ୍କ ଖେଳାଇଥିବା ବେଳେ ପଙ୍ଗପାଳ ଆତଙ୍କ ଦିଲ୍ଲୀବାସୀଙ୍କୁ ଡରାଇଲାଣି। ଗୁରୁଗ୍ରାମ-ଦ୍ୱାରକା ଏକ୍ସପ୍ରେସୱେ ଅଞ୍ଚଳର ବିମାନବନ୍ଦର ନିକଟରେ ପଙ୍ଗପାଳମାନେ ଦେଖାଯିବା ପରେ ବିମାନ ଅବତରଣ ଏବଂ ବିମାନ ଉଡ଼ାଣ ସମୟରେ ଆବଶ୍ୟକ ସତର୍କତା ଅବଲମ୍ବନ କରିବାକୁ ପାଇଲଟମାନଙ୍କୁ ଦିଲ୍ଲୀ ଏୟାର ଟ୍ରାଫିକ କଣ୍ଟ୍ରୋଲ (ଏଟିସି) ଶନିବାର ନିର୍ଦ୍ଦେଶ ଦେଇଛି। ଏହା ସହ ପରିସ୍ଥିତି ଉପରେ ନଜର ରଖିବା ପାଇଁ ଏକ ଟିମ୍ ମଧ୍ୟ ଗଠନ କରାଯାଇଛି।ଏଟିସିର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ବିମାନବନ୍ଦର ନିକଟରେ ପଙ୍ଗପାଳ ଦେଖାଯିବା ପରେ ସମସ୍ତ ବିମାନର ପାଇଲଟଙ୍କୁ ଚେତାବନୀ ଦିଆଯାଇଛି । ପଙ୍ଗପାଳକୁ ଦୃଷ୍ଟିରେ ରଖି ଆମେ ଏକ ଟିମ୍ ମଧ୍ୟ ଗଠନ କରିଛୁ। ବର୍ତ୍ତମାନ ଦିଲ୍ଲୀ ବିମାନବନ୍ଦରରେ ପୂର୍ବରୁ ଧାର୍ଯ୍ୟ ସମୟ ଅନୁସାରେ ବିମାନ ଚଳାଚଳ କରୁଛି | ଆବଶ୍ୟକ ପଡ଼ିଲେ ଏହି ଉଡ଼ାଣ ଓ ଅବତରଣ ସମୟ ବଦଳାଯାଇପାରେ ବୋଲି ସେ କହିଛନ୍ତି | ଏହା ସହ ପରିସ୍ଥିତିକୁ ଦେଖି ଏହାର ମୁକାବିଲା ପାଇଁ ଦିଲ୍ଲୀ ସରକାରଙ୍କ ସହର ବିକାଶ ମନ୍ତ୍ରୀ ଗୋପାଳ ରାୟ ଏକ ଜରୁରୀ ବୈଠକ ଡାକିଛନ୍ତି | ବୈଠକ ପରେ ପରିସ୍ଥିତିର ମୁକାବିଲା ପାଇଁ ଦିଲ୍ଲୀ ସରକାର ଏକ ପରାମର୍ଶବଳୀ ଜାରି କରିବେ। ଏହି ବୈଠକରେ ବିକାଶ ସଚିବ, ବିଭାଗୀୟ କମିଶନର, କୃଷି ନିର୍ଦ୍ଦେଶକ ଏବଂ ଜିଲ୍ଲା ମାଜିଷ୍ଟ୍ରେଟ ଯୋଗଦେବେ ବୋଲି ଜଣା ପଡିଛି ।

Spread the love

Leave a Reply

Your email address will not be published. Required fields are marked *