ଉତ୍ତରାଖଣ୍ଡ ହେଡ୍‌ କୋଚ୍ ହେଲେ ଜାଫର

ମୁମ୍ବାଇ : ପୂର୍ବତନ ଭାରତୀୟ ଓପନର ତଥା ଡେମୋଷ୍ଟିକ୍‌ ହେଭିଓ୍ବେଟ୍‌ ଓ୍ବାସିମ୍‌ ଜାଫର ଉତ୍ତରାଖଣ୍ଡ କ୍ରିକେଟ ଦଳର ମୁଖ୍ୟ କୋଚ୍‌ ନିଯୁକ୍ତ ହୋଇଛନ୍ତି। ଆଗାମୀ ଘରୋଇ ସେସନ୍‌ରେ ସେ ଦାୟିତ୍ୱ ବହନ କରିବେ। ଗୋଟିଏ ବର୍ଷ ପାଇଁ ଏ ନେଇ ଚୁକ୍ତି କରିଛନ୍ତି ବୋଲି ଜାଫର କହିଛନ୍ତି। ପ୍ରଥମଥର ପାଇଁ ଜାଫର କୌଣସି ଦଳର ମୁଖ୍ୟ କୋଚ୍‌ ନିଯୁକ୍ତ ହୋଇଛନ୍ତି। ରଣଜୀ ଟ୍ରଫି ଇତିହାସରେ ଜାଫର ସର୍ବାଧିକ ରନ୍‌ ସଂଗ୍ରହ କରି ରେକର୍ଡ କରିଛନ୍ତି। ଦୀର୍ଘ ଦୁଇ ଦଶନ୍ଧି ଖେଳିବା ପରେ ଗତ ମାର୍ଚ୍ଚରେ ସେ ଏହି ରେକର୍ଡ ସ୍ଥାପନ କରିଥିଲେ। ପ୍ରଥମେ ସେ ମୁମ୍ବାଇ ଓ ପରେ ସେ ବିଦର୍ଭ ତରଫରୁ ରଣଜୀ ଟ୍ରଫି ଖେଳିଥିଲେ।ପ୍ରଥମଥର ପାଇଁ କୌଣସି ଦଳର ମୁଖ୍ୟ କୋଚ୍‌ ନିଯୁକ୍ତ ହୋଇଥିବାରୁ ଏହା ମୋ ପାଇଁ ନିଶ୍ଚିତ ଭାବେ ଚ୍ୟାଲେଞ୍ଜ୍‌ ସୃଷ୍ଟି କରିଛି। ନୂଆ ଦାୟିତ୍ୱକୁ ସୁଚାରୁ ରୂପେ ସମ୍ଭାଳିବାକୁ ପ୍ରୟାସ କରିବି ବୋଲି ସେ କହିଛନ୍ତି। ଉତ୍ତରାଖଣ୍ଡ ଦଳ ନୂଆ ହୋଇଥିଲେ ମଧ୍ୟ ଭଲ ପ୍ରଦର୍ଶନ କରିଛି। ୨୦୧୮-୧୯ ରଣଜୀ ସେସନରେ ଏହି ଦଳ କ୍ୱର୍ଟରଫାଇନାଲରେ ପ୍ରବେଶ କରି ବିଦର୍ଭକୁ ଭେଟିଥିଲା। ତେବେ ଏହା ପରେ ଦଳ ପ୍ଲେଟ ଗ୍ରୁପ୍‌ ଡି’କୁ ଖସିଯାଇଥିଲା। ଫଳରେ ଆଗକୁ ବଡ଼ା ଚ୍ୟାଲେଞ୍ଜ୍‌ ନିଶ୍ଚିତ ରହିଛି। ନୂଆ ଦାୟିତ୍ୱ ଭଲ ଅଭିଜ୍ଞତା ଆଣିଦେବ। ମୁମ୍ବାଇ ଓ ବିଦର୍ଭ ପାଇଁ ଖେଳୁଥିବା ବେଳେ ଯୁବ ଖେଳାଳିଙ୍କୁ ପରାମର୍ଶ ଦେଉଥିଲି। ତେଣୁ ଏହି ଅଭିଜ୍ଞତା ଆଗକୁ କାମରେ ଆସିବ ବୋଲି ୪୨ ବର୍ଷୀୟ ଜାଫର କହିଛନ୍ତି। ଉତ୍ତରାଖଣ୍ଡରେ ବହୁ ପ୍ରତିଭାସମ୍ପନ୍ନ ଖେଳାଳି ରହିଛନ୍ତି। ଏମାନଙ୍କୁ ଭଲ ଖେଳାଳିରେ ପରିଣତ କରାଯିବାର ଆବଶ୍ୟକତା ରହିଛି। ଜାଫର ଭାରତ ପାଇଁ ୩୧ ଟେଷ୍ଟ ଓ ୨ଟି ଦିନିକିଆ ମ୍ୟାଚ୍‌ ଖେଳିଛନ୍ତି। ୨୦୧୮-୧୯ରେ ଉତ୍ତରାଖଣ୍ଡ ରଣଜୀ ଟ୍ରଫିରେ ପଦାର୍ପଣ କରି କ୍ୱାର୍ଟର ଫାଇନାଲରେ ପ୍ରବେଶ କରି ବିଦର୍ଭଠାରୁ ଏକ ଇନିଂସ ଓ ୧୧୫ ରନରେ ପରାସ୍ତ ହୋଇଥିଲା। ତେବେ ଏହା ପର ସେସନ୍‌ରେ ଦଳ ଗ୍ରୁପ୍‌ ସି’ରୁ କ୍ୱାର୍ଟର ଫାଇନାଲ ଅତିକ୍ରମ କରିପାରି ନ ଥିଲା।

Spread the love

Leave a Reply

Your email address will not be published. Required fields are marked *